Naxçıvan Muxtar Respublikası Ali Məclisi Sədri tərəfindən 7 iyun 2021-ci il tarixdə “Naxçıvan Muxtar Respublikasında STEAM təhsil metodunun tətbiqi ilə bağlı tədbirlər haqqında” Sərəncam imzalanmışdır. Sərəncamın icrası ilə bağlı Naxçıvan Muxtar Respublikası Nazirlər Kabinetinin 11 iyun 2021-ci il tarixli Qərarı ilə “Naxçıvan Muxtar Respublikasında STEAM təhsil metodunun tətbiqi ilə bağlı Tədbirlər Planı” təsdiq edilmişdir.

Tədbirlər Planına uyğun olaraq Təhsil Nazirliyi və Gənclər Fondunun təşkilatçılığı ilə hər il iyul-avqust ayları tələbə və şagirdlərin asudə vaxtının səmərəli təşkili məqsədilə “STEAM yay məktəbi”nin keçirilməsi nəzərdə tutulmuşdur. Tədbirlər planının icrası məqsədilə ilk olaraq  Təhsil Nazirliyi tərəfindən ümumtəhsil məktəblərinin 60 şagirdi üçün  6-9 və 13-16 iyul 2021-ci il tarixlərdə “STEAM yay məktəbi” təşkil edilmişdir. Bu istiqamətdə görülən işlərin davamı olaraq avqust ayının 3-dən tələbələr üçün təşkil edilən “Yay məktəbi”nin də proqramına STEAM təhsili üzrə mövzular daxil edilib. Belə ki, Naxçıvan Muxtar Respublikası Gənclər və İdman Nazirliyi, Gənclər Fondu, Həmkarlar İttifaqları Şurası və YAP  Naxçıvan Muxtar Respublika Təşkilatının İcra Katibliyinin təşkilatçılığı ilə keçirilən “Yay məktəbi”ndə iştirak edən 46 tələbəyə Təhsil Nazirliyinin STEAM üzrə təlimçiləri tərəfindən proqrama uyğun layihə əsaslı dərslər keçirilmişdir.

Naxçıvan Muxtar Respublikasının Dövlət İmtahan Mərkəzi tərəfindən müəllimlərin dövlət ümumi təhsil müəssisələrinə işə qəbulu üçün elan edilmiş müsabiqənin test imtahanlarına start verilib.
Nazirlər Kabinetinin “Naxçıvan Muxtar Respublikasında pedaqoji heyətin dövlət ümumi təhsil və peşə təhsili müəssisələrinə işə qəbulu, bilik və bacarıqlarının qiymətləndirilməsinin aparılması Qaydaları”nın təsdiq edilməsi haqqında 14 aprel 2018-ci il tarixli qərarına əsasən keçirilən müsabiqəyə ən çox Şərur (57), Ordubad (49) və Şahbuz (33) rayonlarından olmaqla ümumilikdə 214 vakant vəzifə çıxarılıb. Bu dəfəki müsabiqəyə indiyə qədər bu istiqamətdə keçirilmiş imtahanlar üzrə ən çox namizəd müraciət edib. 858 namizədin sənəd təqdim etdiyi müsabiqədə daha çox qeydiyyat Şərur (225), Ordubad (161) və Culfa (121) rayonları üzrə olub. Ayrı-ayrı ixtisaslara nəzər saldıqda isə ən sıx müsabiqə vəziyyəti ibtidai sinif (210), riyaziyyat (113), Azərbaycan dili və ədəbiyyat (94), tarix (92) və ingilis dili (86) müəllimliyi üzrə qeydə alınıb.

Naxçıvan  Muxtar  Respublikası  Təhsil Nazirliyinin təşkilatçılığı ilə  “2 avqust -Azərbaycan Kinosu Günü” ilə bağlı Heydər Əliyev Uşaq-Gənclər Yaradıcılıq Mərkəzində məktəbdənkənar təhsil müəssisələrinin dərnək üzvlərinə Azərbaycan uşaq filmləri arasında xüsusi yeri olan "Sehirli xalat" filmi nümayiş olunmuşdur.  Məktəblilərə maraqlı olan "Sehirli xalat" filmi bu gün də onlar üçün aktual olaraq qalır, bu filmlərin şagirdlər üçün əhəmiyyəti, mənəvi-tərbiyəvi rolu böyükdür. Filmə baxarkən uşaqlar bir növ keçmişə və gələcəyə səyahət edirlər. Ədəbiyyatda nağıl janrına necə böyük maraq varsa, eləcə də "Sehirli xalat" filmi də məktəblilər tərəfindən böyük maraqla qarşılanır.

Naxçıvan Muxtar Respublikası Təhsil Nazirliyinin yay tədbirlər planına əsasən  avqustun 2-də Heydər Əliyev Uşaq-Gənclər Yaradıcılıq Mərkəzində “1 avqust- Azərbaycan Əlifbası və Azərbaycan Dili Günü” ilə bağlı bədii qiraət dərnəyinin üzvləri arasında şeir müsabiqəsi təşkil edilmişdir.

Tədbiri giriş sözü ilə açıq elan edən Heydər Əliyev Uşaq-Gənclər Yaradıcılıq Mərkəzinin direktoru Rəşad Xudiyev bu günün önəmindən və dilimizin tarixindən tədbir iştirakçılarına məlumat verib.