Naxçıvan Muxtar Respublikası Ali Məclisi Sədri tərəfindən 7 iyun 2021-ci il tarixdə “Naxçıvan Muxtar Respublikasında STEAM təhsil metodunun tətbiqi ilə bağlı tədbirlər haqqında” Sərəncam imzalanmışdır. Sərəncamın icrası ilə bağlı Naxçıvan Muxtar Respublikası Nazirlər Kabinetinin 11 iyun 2021-ci il tarixli Qərarı ilə “Naxçıvan Muxtar Respublikasında STEAM təhsil metodunun tətbiqi ilə bağlı Tədbirlər Planı” təsdiq edilmişdir.

Naxçıvan Muxtar Respublikası Təhsil Nazirliyinin təşkilatçılığı ilə “Yay Tədbirlər Planı”na əsasən avqustun 17-si Şərur, Kəngərli və Sədərək Rayon Uşaq-Gənclər Yaradıcılıq mərkəzlərinin dərnək üzvləri arasında ilk dəfə “Açıq kitabxana” layihəsi adı ilə açıq hava altında kitab oxu aksiyası keçirilib və oxucularla kitabların müzakirəsi aparılıb. Şərur şəhər 2 nömrəli tam orta məktəbdə keçirilən tədbirdə 20-yə yaxın dərnək üzvü və dərnək rəhbərləri iştirak edib.

Tədbirdə çıxış edən Təhsil nazirinin müavini Heyran Əhmədova muxtar respublikada gənc nəslin bilikli, savadlı və intellektli formalaşması üçün göstərilən dövlət qayğısından, yaradılan hərtərəfli şəraitdən, ümumtəhsil məktəblərində keçirilən tədbirlər və onların əhəmiyyətindən danışıb.

Bu gün Kəngərli rayon Uşaq-gənclər idman məktəbinin təşkilatçılığı ilə məktəbdənkənar təhsil müəssisələrinin Yay Tədbirlər Planına uyğun olaraq “İdman sağlamlıqdır” mövzusunda boks idman klublarının idmançılarına yay məşqləri keçirilib.

Məşqlərin keçirilməsində əsas məqsəd ümumtəhsil məktəblərində bədən tərbiyəsi və idmanın şagirdlər arasında kütləviləşdirilməsi, məktəblərdə sağlam və fəal həyat tərzinin təşviqi, asudə vaxtın səmərəli təşkilindən ibarətdir.

Avqustun 16-da Naxçıvan Muxtar Respublikası Təhsil Nazirliyində Amerika Birləşmiş Ştatlarının ölkəmizdəki fövqəladə və səlahiyyətli səfiri Örl Litzenberq və onun rəhbərlik etdiyi nümayəndə heyəti ilə görüş keçirilib.

Görüş zamanı Təhsil naziri Rəhman Məmmədov muxtar respublikada fəaliyyət göstərən təhsil müəssisələri haqqında geniş məlumat verərək bildirmişdir ki,  müstəqillik dövründə muxtar respublikada bütün təhsil müəssisələri, o cümlədən məktəb binaları, məktəbəqədər və məktəbdənkənar təhsil, musiqi məktəbləri, ali və orta ixtisas təhsili müəssisələri üçün yeni tədris binaları tikilib istifadəyə verilmişdir. Tikilən və ya əsaslı şəkildə yenidən qurulan təhsil müəssisələrində müasir elm və təhsil infrastrukturu formalaşdırılmışdır. Bunlarla yanaşı şagirdlərin asudə vaxtlarının, onların intellektual səviyyəsini və istedadlarının üzə çıxarılması məqsədilə muxtar respublikada məktəbdənkənar təhsil müəssisələri, şahmat və musiqi məktəbləri fəaliyyət göstərir.