Fevralın 23-də Naxçıvan şəhər 4 nömrəli tam orta məktəbdə Respublika məktəblilərinin fənn olimpiadasının yarımfinal turu keçirilmişdir.

Fənn olimpiadalarının keçirilməsində əsas məqsəd şagirdlərdə biliklərə marağı artırmaq və özünə inam hisslərini gücləndirmək, ayrı-ayrı fənlər üzrə istedadı və yaradıcı təfəkkürü ilə fərqlənənləri aşkar etmək, şagirdlərin ixtisas və peşə seçiminə hazırlanmasına dəstək olmaqdan ibarətdir.

Respublika fənn olimpiadası Azərbaycan dili və ədəbiyyat, tarix, coğrafiya, riyaziyyat, fizika, kimya, biologiya, informatika fənləri üzrə təşkil edilmişdir. Yarımfinal turuna muxtar respublika ümumtəhsil məktəblərində təhsil alan, Respublika fənn olimpiadalarının şəhər və rayon mərhələsinin qalibi olmuş 218 nəfər IX-XI sinif şagirdləri cəlb olunmuşdur.

Muxtar respublika fənn olimpiadasının yarımfinal turunda şagirdlərə fənlərdən 25-40 sual təqdim edilmiş və imtahan üçün  3 (üç) saat vaxt ayrılmışdır.

Olimpiadanın yarımfinalfinal turunun yekunları respublika təşkilat komitəsi tərəfindən qiymətləndiriləcək.