21 fevral 2020-ci il tarixdə Naxçıvanşünaslıq Mərkəzində elmi katib Nihat Tarverdiyev tərəfindən “Xocalı soyqırımı qan yaddaşımızdır” mövzusunda açıq dərs keçirilmişdir. Dərsdə Naxçıvan şəhər 8 nömrəli tam orta məktəbin IX-X sinif şagirdləri iştirak etmişdir. Açıq dərsdə qeyd olunmuşdur ki, insanlığa qarşı öz vəhşiliyinə və qəddarlığına görə ən dəhşətli kütləvi terror hadisələrindən biri kimi tarixə düşmüş Xocalı soyqırımının törədilməsindən 28 il keçir.

Misli görünməmiş vəhşiliklə həyata keçirilən bu soyqırımı XX əsrin ən dəhşətli faciələrindən biridir. Dinc, silahsız xocalılara bir gecənin içində amansız divan tutulmuşdur. Soyqırımı nəticəsində yüzlərlə qadın, kişi, yaşlı, cavan, körpə uşaq həlak olmuşdur. Xocalı faciəsinin Azərbaycan xalqının qan yaddaşı olduğunu dəfələrlə bəyan etmiş ulu öndər Heydər Əliyev hadisələrə beynəlxalq aləmdə əsl siyasi qiymətin verilməsinin zərurliyini vurğulamış, bu məsələnin dünya ictimaiyyətinə çatdırılması üçün xüsusi səy göstərmişdir. Xocalı həqiqətlərinin dünyaya çatdırılması, bu həqiqətlərin beynəlxalq aləmdə yayılması, qətliama obyektiv qiymət verilməsi istiqamətində Heydər Əliyev Fondunun gördüyü işləri xüsusi minnətdarlıq hissi ilə qeyd etmək lazımdır. Məhz fondun gərgin fəaliyyəti nəticəsində əvvəlki illərdən fərqli olaraq indi dünya ölkələri erməni qəsbkarlarının törətdiyi insanlığa sığmayan Xocalı soyqırımı haqqında daha dolğun məlumatlandırılır.

Sonda məktəblilər Naxçıvanşünaslıq Mərkəzində yaradılan şəraitlə tanış olublar.