Fevralın 21-də Naxçıvan şəhər 4 nömrəli tam orta məktəbdə Xocalı faciəsinin 28-ci ildönümü ilə əlaqədar olaraq faciə qurbanlarının xatirəsi anılıb.

Əvvəlcə Xocalı soyqırımı qurbanlarının xatirəsi bir dəqiqəlik sükutla yad edilib. Tədbirdə giriş sözü ilə açan  məktəbin sinifdənxaric və məktəbdənkənar tərbiyə işləri üzrə direktor müavini Aysel Əsgərova bildirmişdir ki, Xocalı hadisəsini tariximizin faciəli səhifəsi, eyni zamanda vətənpərvərlik, qəhrəmanlıq rəmzi kimi qiymətləndirilib: “Xocalı sakinləri bütün çətinliklərə baxmayaraq, son anadək öz yurd-yuvalarını tərk etmədilər, yüzlərlə insan şəhid oldu. İllər keçsə də, xalqımız bu günü daim xatırlayacaq, unutmayacaq.”

Sonra məktəbin Azərbaycan dili və ədəbiyyat müəllimi Tənzilə Seyidova çıxışında bildirmişdir ki, Xocalı soyqırımını tanıtmaq, bu tarixi gerçəyi dünyaya çatdırmaq hər birimizin vətəndaşlıq borcumuzdur. Bu işdə təhsil sahəsində çalışanların da üzərinə məsuliyyət düşür. Xocalı faciəsinin bütün bəşəriyyətə, insanlığa qarşı amansız cinayət olduğunu, tariximizin qan yaddaşına həkk olunmuş bu qara səhifənin nəsildən-nəslə çatdırılmasını şagirdlərin diqqətinə çatdırmışdır.

Tədbirdə məktəbin V və VI sinif şagirdlərinin çəkdikləri Xocalı faciəsini əks etdirən rəsmlərdən ibarət sərgiyə baxış olmuş, faciə ilə bağlı səhnəciklər hazırlanmış və şeir qiraət etmişlər.