20 fevral 2020-ci il tarixdə Naxçıvan şəhər 8 nömrəli tam orta məktəbin hərbi rəhbəri Babazadə İsmayıl  X sinif şagirdləri üçün Gənclərin Çağırışaqədərki Hazırlığı   fənnindən  “AK 74-7,62 mm-lik və 5,45 mm-lik Kalaşnikov avtomatları və əl pulemyotları” mövzusundan açıq dərs keçmişdir. Dərs elektron lövhəli hərbi kabinədə qrup işi təlim forması əsasında təşkil olunmuşdur. Motivasiya dərslikdəki şəkillər əsasında qurulmuş, “Atıcı silahlar hansılardır və onların əhəmiyyəti nədir?” tədqiqat sualı əsasında dərs keçirilmişdir.

Tədqiqatın aparılması mərhələsində  Kalaşnikov avtomatının və əl pulemyotlarının növləri, hər bir növün göstəriciləri haqqında ətraflı məlumat verilmiş, videomateriala baxılmışdır. Şagirdlər 4 qrupa bölünmüş, qruplara “Şahinlər”, “Mübarizlər”, “Cəsurlar”, “Zəfər” adları verilmişdir. Qrup işlərinə 5,45mm-lik Kalaşnikov avtomatlarının və əl pulemyotlarının əsas taktiki-texniki xüsusiyyətləri, atış qaydaları və mərmilərin növləri haqqında sual və tapşırıqlar salınmışdır.

Dərsin mərhələlərinin icrasından sonra o nəticəyə gəlinmişdir ki, motoatıcı manqanın şəxsi heyətinin təmin edilməsində, düşmənin canlı qüvvəsinin məhv edilməsində, atəş nöqtələrinin susdurulmasında Kalaşnikov avtomatları və əl pulemyotları çox effektiv silahlardır.