25 dekabr 2019-cu il tarixdə  Naxçıvan Dövlət Xalça Muzeyində Naxçıvan Qızlar Liseyi və Naxçıvan şəhər 4, 5, 6 və 7 nömrəli tam orta məktəblərin şagirdlərinin iştirakı ilə “Xalqımızın qədim ənənəsi-Xalçaçılıq” mövzusunda 5 nömrəli tam orta məktəbin tarix müəllimi Hacıyeva Səadət açıq dərs  keçmişdir.

Açıq dərsdə qeyd olunmuşdur ki, Azərbaycanda xalçaçılıq sənətinin tarixi ölkə ərazisində aparılan arxeoloji qazıntılar və yazılı mənbələrə görə, Azərbaycanda xalça toxuculuğu tunc dövründə, yəni 5 min il bundan əvvəl meydana gəlmişdir. Azərbaycan xalçası boyalarının tükənməz zənginliyi, naxışlarının təkrar edilməz qovuşuğu, yaradıcılıq təxəyyülünün gücü və yüksək sənətkarlığı ilə fərqlənir. Azərbaycanın ayrılmaz tərkib hissəsi olan Naxçıvanda qədim ənənələrə malik xalçaçılıq sənəti dövlətimizin diqqət və qayğısı sayəsində bu gün də yaşadılır və geniş şəkildə təbliğ edilir.

Naxçıvan xalçaları nəinki Azərbaycanda, bütün dünyada süjetli kompozisiyası, ornamentləri, naxışları, bir sözlə özünəməxsus xüsusiyyətləri ilə fərqlənir.

Sonda  isə muzeyin bələdçisi tərəfindən şagirdlərə ekskursiya təşkil olunmuşdur.