“Yay məktəbi”ndə müsabiqə və yarışlarda fərqlənən şagirdlərin mükafatlandırılması ilə bağlı tədbir keçirilib. Tədbirdə Naxçıvan Muxtar Respublikası Təhsil nazirinin müavini Heyran Əhmədova çıxış edib. Bildirilib ki, “Yay məktəbi”ndə məktəblilərin yay tətilini səmərəli keçirmələri üçün Naxçıvan Muxtar Respublikası Təhsil Nazirliyi tərəfindən rəsm müsabiqələri, müxtəlif bilik yarışları, konsert proqramları, sənədli və milli filmlərimizin nümayişləri, muzeylərə ekskursiyalar, idman və şahmat yarışları, “Oxunması zəruri olan kitabların” müzakirəsi, maarifləndirici diskussiyalar keçirilib.

Çıxışlardan sonra 4 günlük “Yay məktəbi” müddətində keçirilən müsabiqə  və yarışlarda qalib olan şagirdlərə diplomlar təqdim edilib.

Tədbirin sonunda Naxçıvan şəhər Heydər Əliyev Uşaq Gənclər Yaradıcılıq Mərkəzinin “Əlvan çiçəklər” rəqs qrupunun hazırladığı konsert proqramı məktəblilərə təqdim edilib.

Naxçıvan Muxtar Respublikasında fəaliyyət göstərən ümumtəhsil məktəbləri şagirdlərinin Ağbulaq İstirahət Mərkəzində Yay məktəbi təşkil olunub. Naxçıvan Muxtar Respublikası Təhsil Nazirliyinin, Naxçıvan Muxtar Respublikası Həmkarlar İttifaqları Şurasının birgə təşkilatçılığı ilə baş tutan yay məktəbində iştirak edən şagirdlərə əvvəlcə mərkəz haqqında məlumat verilib, sonra ərazi ilə tanışlıq olub.

51 şagirdin iştirak etdiyi Yay məktəbində 4 gün ərzində onların asudə vaxtlarının səmərəli təşkili və biliklərinin artırılması məqsədilə müxtəlif əyləncəli oyunlar keçirilib, tarixi və ədəbi mövzularda mühazirələr dinlənilib. Muxtar respublikamızda “Oxunması zəruri olan kitablar” siyahısına daxil olan M.T.Sidqinin “Məktəb hekayələri” kitabının müzakirəsi keçirilib.

Dövlət İmtahan Mərkəzi (DİM) ümumi (9 illik) orta təhsil bazasında orta ixtisas təhsili müəssisələrinin boş qalan yerləri üzrə avqustun 27-dən sentyabrın 2-dək internet vasitəsilə ixtisas seçimi elan edir.

Orta ixtisas təhsil müəssisələrinin boş qalan yerlərinə tələbə qəbulu müsabiqəsində iştirak etmək üçün ixtisas seçiminə qəbul imtahanında (hər iki mərhələ üzrə birlikdə) topladıqları ümumi balı 50-dən, Azərbaycan dili və ya rus dili fənni üzrə balı 20-dən və riyaziyyat fənni üzrə balı 10-dan az olmayan abituriyentlər buraxılır. Xüsusi qabiliyyət tələb edən ixtisasların müsabiqəsində fənlər üzrə bal məhdudiyyəti tətbiq olunmur. Ümumi (9 illik) orta təhsil səviyyəsini Azərbaycan Respublikasının ümumi təhsil müəssisələrində cari ildə bitirən abituriyentlər müsabiqədə tədris dili (Azərbaycan dili və ya rus dili), riyaziyyat və xarici dil fənlərindən buraxılış imtahanında (9-cu siniflər üzrə) əldə etdikləri nəticələr əsasında iştirak edirlər.