Fevralın 7-də Xan Sarayı Dövlət-Tarix Memarlıq, Möminə Xatın və Açıq Səma Altında Muzey Kompleksində Naxçıvan şəhər 1, 2, 16, 17  nömrəli tam orta məktəblərinin şagirdlərinin iştirakı ilə “Naxçıvanın muxtariyyəti tarixi nailiyyətdir” mövzusunda 15 nömrəli tam orta məktəbin tarix müəllimi Cabbarova Süsən  açıq dərs  keçmişdir. Açıq dərs zamanı şagirdlərə çatdırılmışdır ki, Naxçıvan diyarı heç vaxt özünü Azərbaycandan ayrı təsəvvür etməmiş, bütün dövrlərdə dünyanın bir çox dövlətləri üçün də böyük coğrafi-siyasi və strateji əhəmiyyət kəsb etmişdir.

Fevralın 7-də Naxçıvan şəhər 3 nömrəli tam orta məktəbin idman zalında məktəblərdə dostluq və idman əlaqələrinin gücləndirilməsi məqsədilə Naxçıvan şəhər ümumtəhsil məktəblərində fiziki tərbiyə dərslərini tədris edən müəllimlərdən ibarət komandalar arasında voleybol üzrə yoldaşlıq görüşü keçirilmişdir. Tədbirin açılış mərasimində çıxış edənlər yarışın keçirilmə məqsədi haqqında danışmış və komandalara uğurlar arzulamışlar.

Ordubad Rayon İnternat və şəhər 3 nömrəli tam orta məktəbdə Naxçıvan Muxtar Respublikası Daxili İşlər Nazirliyi, Təhsil Nazirliyi və Gənclər və İdman Nazirliyinin birgə təşkilatçılığı ilə yetkinlik yaşına çatmayanlarla profilaktiki işlərə dair tədbirlər planına əsasən tədbir keçirilmişdir. Tədbirdə çıxış edənlər diqqətə çatdırıblar ki, yetkinlik yaşına çatmayanların milli mənəvi dəyərlər, vətənpərvər ruhda tərbiyə edilməsi, asudə vaxtlarını səmərəli keçirilməsi vacib istiqamətlərdən biridir.