18 oktyabr 2019-cu il tarixdə Şəhər və Rayon Təhsil şöbələrinin baş məsləhətçiləri və təhsil müəssisələrinin Təhsilin idarəolunmasının məlumat sistemi üzrə əlaqələndiricilərinə seminar keçirmişdir.

Seminarda Nazirliyin sektor müdiri Məmməd Bayramov çıxış edərək Ümumi Təhsil Müəssisələrinin İnformasiya Sistemi (UTİS) proqramının tətbiqi, əsas xüsusiyyətləri və əhəmiyyəti haqqında ətraflı məlumat verərək vurğulamışdır ki, muxtar respublika üzrə təhsil müəssisələrinin şagird və müəllim heyəti haqqında bütün məlumatların ümumiləşdirilməsi və saxlanılması məqsədilə Ümumi Təhsil Müəssisələrinin İnformasiya Sistemi (UTİS) proqramı tətbiq olunur.

Bu proqramın tətbiqi nəticəsində ümumtəhsil məktəblərinin maddi bazası, sinif komplektləri, kitabxana fondları, laboratoriyaları, həmçinin şagird kontingenti, şagirdlərin təhsil müəssislərinə qəbulu və yerdəyişməsi, təhsil haqqında dövlət sənədlərinin verilməsi, ali və orta ixtisas təhsili müəssisələrinə qəbul olanlar, müəllimlərin təhsili, cari iş fəaliyyəti və digər bu kimi məlumatları əhatə edən elektron məlumat bazası yaradılmışdır.

Bu gün keçirilən seminarın da əsas məqsədi bu məlumatların müntəzəm yenilənməsi prosesində əlaqələndirici kadrların peşəkarlıq səviyyəsini artırmaqdır. Proqramda olan yeniliklərdən də bəhs edən nazirlik əməkdaşı qeyd etmişdir ki, artıq ali və orta ixtisas müəssisələrinə qəbul olan məzunların da sistemə işlənməsinə ehtiyac qalmayacaq. Belə ki, Dövlət İmtahan Mərkəzi ilə inteqrasiya nəticəsində məzunlar haqqında məlumat avtomatik olaraq sistemə köçürüləcəkdir. Sonra seminar iştirakçılarına proqramla işləmə qaydaları haqqında məlumat verilmiş, Təhsilin idarəolunmasının məlumat sisiteminin əlaqələndiricilərinin vəzifələri və məsuliyyəti ilə bağlı müzakirələr aparılmış, onları maraqlandıran suallar cavablandırılmışdır.

Seminarın sonunda iştirakçılara “Ümumi Təhsil Müəssisələrinin İnformasiya Sistemi” təlimatı paylanmışdır.