“Vətənin Müdafiəsinə Hazıram” poliatlon çoxnövçülüyü üzrə respublika final mərhələsinin qalibi olmuş  Babək rayon Payız kənd tam orta məktəbinin komandasının mükafatlandırılması mərasimi keçirilib.
Tədbirdə Naxçıvan Muxtar Respublikasının Təhsil naziri Rəhman Məmmədov və Naxçıvan Muxtar Respublikasının Gənclər və İdman naziri Azad Cabbarov məktəbliləri qazanılan uğura görə təbrik edib, gələcək təhsil və idman yarışlarında onlara uğurlar arzulayıblar.

Payız kənd tam orta məktəbinin direktoru Turan Məmmədli əldə edilən uğurun Payız kənd tam orta məktəbində yaradılan müasir tədris şəraitinin nəticəsi olduğunu vurğulayıb. Bu şəraitə, təhsilə göstərdiyi dövlət qayğısına görə Naxçıvan Muxtar Respublikası Ali Məclisinin Sədrinə məktəbin kollektivi adından minnətdarlığını bildirib.
Sonra  Payız kənd tam orta məktəbinin qalib komandasına diplom, kubok və nazirliklərin plaketləri, komandanın üzvlərinə isə idman geyim dəsti və çantası hədiyyə edilib.
Qeyd edək ki, aprelin 24-dən 29-dək Göygöl rayonunda yaz çağırışına həsr olunan poliatlon çoxnövçülüyü üzrə respublika çempionatı keçirilib. Ölkənin müxtəlif bölgələrindən olan 16 komanda arasında Babək rayon Payız kənd tam orta məktəbinin komandası qalib gələrək çempion olub. Komandanın üzvlərindən Fərid Əsədov və Sənan Əşrəfov idman oyununun 100 və 2000 metr məsafəyə qaçış mərhələlərində ən yüksək nəticə göstərərək kubokla mükafatlandırılıblar.