Müzakirədə iştirak edən Naxçıvan Muxtar Respublikası Təhsil nazirinin müavini Ovni Muradov bildirib ki, Naxçıvan Muxtar Respublikası Ali Məclisində "Naxçıvan Muxtar Respublikasında ali və orta ixtisas təhsili müəssisələrində ixtisasların müvafiq təşkilatlara hamiliyə verilməsinin vəziyyəti və innovasiyaların dəstəklənməsi barədə" keçirilən müşavirədə Ali Məclisin Sədri tərəfindən verilən tapşırıqların icrası diqqətdə saxlanılır. Verilən tapşırıqların icrasının təmin olunması məqsədilə “Sabahın müəllimi” layihəsi çərçivəsində Təhsil Nazirliyi ali məktəblərin professor və müəllim heyətləri ilə birlikdə yeni dərslik və dərs vəsaitlərinin müzakirəsini həyata keçirir.
Bildirilib ki, növbəti kitab müzakirəsi III siniflərin Azərbaycan Dili və Riyaziyyat dərsliklərinə həsr olunub. Müzakirələrin sonunda rəy və təkliflər hazırlanacaq ki, bu da həmin dərsliklərinin təkmilləşdirilməsinə öz töhfəsini verəcək.
Ovni Muradov qeyd edib ki, Təhsil Nazirliyi tərəfindən hazırlanan qrafikə uyğun olaraq 2021-2022-ci tədris Azərbaycan dili, Ədəbiyyat, İngilis dili, Riyaziyyat, İnformatika, Fizika, Kimya, Biologiya, Azərbaycan tarixi, Ümumi tarix və Coğrafiya dərsliklərinin müzakirəsi keçirilib.
Çıxışlardan sonra müzakirələrə başlanılıb. Müzakirədə iştirakçılar dərsliyin həm keyfiyyətcə, həm də məzmunca yüksək səviyyədə hazırlandığını qeyd etməklə yanaşı, bir sıra çatışmamazlıqların da olduğunu da diqqətə çatdırıblar.
Müzakirələrdən sonra yekun təkliflər hazırlanaraq Naxçıvan Muxtar Respublikası Təhsil Nazirliyinə təqdim olunub.
