Naxçıvan Gənc Müəllimlər Assosiasiyasının sədri Gülxanım Orucova bildirib ki, artıq bir neçə ildir Naxçıvan Muxtar Respublikası Təhsil Nazirliyi tərəfindən aprel ayı “Mütaliə aylığı” elan olunur. Bu ayda təsdiq olunan iş planına uyğun olaraq həm şagirdlər, həm də müəllimlərin mütaliəsi üçün müxtəlif tədbirlər keçirilir, yeni-yeni yaradıcı layihələr icra olunur. Bu ay ərzində Naxçıvan Gənc Müəllimlər Assosiasiyası tərəfindən də müəllimlər arasında kitab müzakirələri təşkil olunur, “Mütaliəçi müəllim” layihəsi və “Ən yaxşı mütaliəçi müəllim” müsabiqəsi keçirilir. Bu gün keçirilən kitab müzakirəsi də həmin tədbirlərdən biridir.
Naxçıvan Gənc Müəllimlər Assosiasiyasının sədr müavini Səkinə Əsgərova qeyd edib ki, “Pedaqoji fikir tarixindən” kitabı da hər bir vətəndaşın şəxsiyyət kimi inkişafına, mənəviyyatına xidmət edir, bu kitab gələcək müəllimlər üçün də həmişə aktuallığını qoruyub saxlayacaqdır.
Sonra kitabın müzakirəsinə başlanılıb. Gənc müəllimlər kitabın müəllimlərin fəaliyyətinin istiqamətləndirilməsində, gənc nəslin təlim-tərbiyəsində mühüm rol oynadığını bildiriblər. Müzakirədə 50-dən artıq müəllim iştirak edib.
