Bədən tərbiyəsi və idmanın məktəblilər arasında kütləviliyinin      artırılması, ümumtəhsil məktəblərinin idman klublarının fəaliyyətlərinin qiymətləndirilməsi və stolüstü tennis idman növünün inkişafının təmin edilməsi və məktəblilərin asudə vaxtlarının səmərəli təşkil olunması məqsədilə yanvarın 25-də Naxçıvan Muxtar Respublikası Təhsil, Gənclər və İdman nazirlikləri birlikdə ümumtəhsil məktəblərinin stolüstü tennis idman klubları arasında muxtar respublika birinciliyi keçirilib.

Birincilikdə 7 komanda iştirak edib. Birincilik iki mərhələ-rayondaxili və final mərhələsi üzrə keçirilmişdir. Rayondaxili yarışlarda I yeri tutan məktəb komandaları final mərhələsində qarşılaşıblar. Oyunların yekun nəticəsinə əsasən Şərur rayonunun  Arbatan kənd tam orta məktəbinin komandası I, Sədərək rayon kənd 1 nömrəli tam orta məktəbin komandası II, Kəngərli rayonunun Şahtaxtı kənd tam orta məktəbinin komandası isə III yeri tutaraq qalib olublar.

Qalib  məktəb komandaları təşkilatçılar tərəfindən  diplomla  təltif olunublar.

Mükafatlandırma mərasimində Naxçıvan Muxtar RespublikasınınTəhsil Nazirliyinin aparatının sektor müdiri Murad Babayev, Naxçıvan Muxtar Respublikasının Gənclər və İdman Nazirliyinin aparatının şöbə müdiri Taleh İbrahimov və Naxçıvan Muxtar Respublikası Atletika Federasiyası sədr müavini İntiqam Rəhimov iştirak ediblər.