Muxtar respublikada istedadlı şagirdlərlə aparılan iş sahəsində mühüm tədbirlər həyata keçirilir. Şagirdlərdə özünə inam hissini formalaşdırmaq, ayrı-ayrı fənlər üzrə bilik və bacarıqlarını aşkara çıxarmaq, təhsildə sağlam rəqabət yaratmaq məqsədilə istedadlı şagirdlər arasında fənn olimpiadaları keçirilir. Bu olimpiadalardan biri də respublika fənn olimpiadasıdır.

22 yanvar 2022-ci il tarixdə əvvəlcədən müəyyən edilmiş mərkəzlərdə  IX-XI sinif şagirdləri arasında məktəblilərin respublika fənn olimpiadasının şəhər və rayon mərhələsi keçirilmişdir. 657 şagirdin iştirak etdiyi bu bilik yarışında şagirdlər Azərbaycan dili və ədəbiyyat, riyaziyyat, fizika, kimya, biologiya, informatika, tarix və coğrafiya olmaqla 8 fənn üzrə öz bilik və bacarıqlarını nümayiş etdirmişlər. Şagirdlərə hər fənn üzrə fənn kurikulumuna uyğun olaraq qapalı test formasında hazırlanmış 25 sual təqdim olunmuşdur. Həmin test tapşırıqlarını cavablandırmaq üçün şagirdlərə üç saat vaxt verilmişdir.

Şəhər və rayon mərhələsinin nəticələrinə əsasən hər fənn üzrə hər sinifdən ən yüksək nəticə göstərən şagirdlər olimpiadanın ikinci mərhələsinə vəsiqə qazanacaqdır.

Qeyd edək ki, öən il keçirilən Respublika fənn olimpiadasında muxtar respublika şagirdlərindən 5-i I, 13-ü II, 8-i III yer olmaqla, 26-sı qalib olmuşdur.

Naxçıvan Muxtar Respublikası

Təhsil Nazirliyinin mətbuat xidməti